La xornada de trabayu o xornada llaboral ta formada pol númberu d'hores que'l trabayador ta obligáu a trabayar efeutivamente. Tien d'estremase del conceutu de "horariu de trabayu", la xornada representa'l "númberu d'hores que'l trabayador tien d'emprestar el so serviciu", ente que el "horariu" afita la hora d'entrada y la salida. Ente horariu y xornada prevalez la xornada, yá que el salariu qu'afita'l contratu vien determináu pol númberu d'hores que se trabaya.[1][2]
Si l'horariu establecíu torgara que pudiera realizase la xornada completa, l'empresariu va poder imponer el cumplimientu íntegru de la xornada.[1]
En términos xenerales, les hores de trabayu habituales de los países de tol mundu tán en redol a 40 a 48 hores per selmana, sicasí, esta situación nun se da perdayuri habiendo notables disparidades al respeutu: dende les 35 hores per selmana en Francia,[3] hasta les 112 hores per selmana nos campos de trabayos forzaos de Corea del Norte.[4]